चिकन करी - सीकेपी स्टाईल

  

साहित्य :
चिकन 500 ग्रॅम
दही 3 चमचे
१ चमचा आलं लसूण पेस्ट
लसूण ४-५
तिखट 1 चमचे,
हळद ¹/² चमचा
मीठ 1चमचा
गरम मसाला 1¹/² चमचा ( बडिशेप, धणे, लवंग, मिरे, दालचिनी यांची पूड)
तेल 3-4 चमचे
कांदे मोठे तीन
खोबऱ्याचे काप पाव वाटी
टॉमेटो 2

कृती:

1. चिकन स्वच्छ धुवून, निथळून त्याला दही, हळद, तिखट, मीठ, आलं लसूण पेस्ट लावून घेणे.

2. २ कांदे उभे चिरून घेणे.

3. १ कांदा, टॉमेटो बारीक चिरणे.

4. पॅन मधे अर्धा चमचा तेल तापवून त्यात उभा चिरलेला कांदा, कोथिंबीरीच्या काड्या, लसूण लाल होई पर्यंत परतणे. ते काढून त्याच पॅनमधे खोबऱ्याचे काप  लालसर परतने. हे सर्व मिक्सरमधे बारीक वाटून घेणे.

5. मोठ्या भांड्यात २ चमचे तेल घेऊन त्यात बारीक चिरलेला कांदा टाकणे. तो ट्रान्सपरन्ट झाला की त्यात टॉमेटो परतणे.

6. त्यात चिकन टाकून परतणे.

7. आता त्यात वाटण टाकून थोडावेळ परतावे.

8. चिकनचा रंग पांढरा झाला की १ कप पाणी, गरम करून टाकणे.

9.  सगळे उकळले की गॅस बारीक करून झाकण ठेऊन शिजवणे.

10. १५ मिनिटांनी हलवणे. हवे तर पाणी अजून अर्धाकप घालणे.

11. साधारण 20 मिनिटांनी चिकन शिजेल. वरून कोथिंबीर टाकावी.

12. शेवटी चव चाखून बघणे. तिखट मीठ अॅडजेस्ट करणे.

कैरी चिली सॉस

 साहित्य:

एक मोठी कैरी सोलून बारीक तुकडे करून

५ चमचे साखर

दोन चमचे तिखट

एक चमचा बडिशेप

एक चमचा जिरे

एक चमचा मिरे पावडर

अर्धा चमचा मीठ

४ चमचे पाणी

कृती:

सर्व साहित्य जाड बुडाच्या कढईत ठेवून मंद आचेवर ठेवावे. सारकं हलवत रहावं. साखर विरघळली की गॅस बारीक करून झाकण ठेवून एक वाफ काढावी. लगेच गॅस बंद करावा.

२ मिनिटांनी झाकण काढून सगळे हलवावं. पूर्ण गार होऊ द्यावे. मग मिक्सरमधे फिरवून एकजीव करावे. 

काचेच्या बरणीत ठेवावे. हा कैरी चिली सॉस आंबट तिखट गोड चवीचा कशाही बरोबर खाऊ शकता. गुजराथी छुंद्याच्या जवळपास जाणारी चव. तिखट साखर याचे प्रमाण आपल्या आवडीनुसार आणि कैरीच्या आंबटपणानुसार कमी जास्त करू शकता. बडिसेप अन मीरे यामुळे एक वेगळी चव येते. 

सोडे घालून पोहे

 

खरं तर फार काही वेगळं नाही. तरी तपशीलवार-

(चार जणासाठीचा अंदाज)
आधी मूठभर सोडे गरम पाण्यात भिजत ठेवायचे
मग परहेड एक मूठ पोहे भिजवून ठेवायचे.
दोन मोठे कांदे बारीक चिरून घ्यायचे.
4-6 मिरच्या उभ्याच चिरायच्या. लिंबू कापून बिया काढायच्या.
आता सोडे मऊ झाले असतील तर ते कात्री/ सुरीने कापून घेणे.(2-3 तुकडे एकाचे)

अंमळ जास्त तेल घेऊन नेहमीची मोहरी, हिंग फोडणी करून मिरच्या, कांदा घालावा. हळद टाकावी. कांदा जरा परतला की सोडे घालावेत. जरा परतून गॅस बारीक करून झाकण ठेवावं 3-4 मि.
मग परतवून पोहे, कोथिंबीर, मीठ (साखर चिमुटभरही घालायची नाही) टाकून परतवावं. पुन्हा झाकण ठेवून दणदणीत वाफ काढावी. गॅस बंद करावा.
3-4 मि नी झाकण काढून एकदा सगळं हलवावं. वरून लिंबू, अजून जरा कोथिंबीर घालून सर्व्ह करावेत.

ज्वारीची धिरडी कम आंबोळी

साहित्य:

एक वाटी ज्वारी पीठ

अर्धी वाटी रवा

अर्धीवाटी दही

डाळं/ दाणे मूठभर

मिरच्या चवीनुरुप

कोथिंबीर असेल तर

मीठ

गाजर, कोबी, सि मी हवं ते बारीक किसून/ चिरून

कृती:

भाज्या सोडून सगळं + एक वाटी पाणी

घालून मिक्सीत फिरवून घ्यायचं. साधारण इडलीपीठा सारखी कनिसिस्टन्सी हवी. तासभर झाकून ठेवायचं. नंतर भाज्या मिक्स करून मध्यम आचेवर आंबोळी काढायची. झाकण ठेवून. 

तूप/ लोण्यासोबत खायला घ्यातत

आयत्या वेळी करायचं तर इनो टाकू शकाल अर्धा चमचा.

अळणी चिकन

चिकनला दही, हळद, मीठ, लसूण वाटून लावून ठेवा.

ओलं खोबरं, लसूण, मिरे (तिखटपणा फक्त याचाच असणार तर तुमच्या चवीनुरुप), 5-6 काजू हे बारीक वाटून घेणे.

तेलात 2 तमालपत्र तोडून टाका, 4 लवंगा टाका  आता त्यात कांदा बारीक चिरून  परत. त्यात चिकन परत. गरम पाणी घालून चिकन छान शिजू देत.

मग वाटण घालून एक उकळी काढून झाकून पाच मिनिटं शिजू दे. मग हवं तितकं घट्ट, जाड ठेव. वरून कोथिंबीर.

यात टॉमेटो, तिखट काहीही लाल घालायचं नाही. पिवळसर सोनेरी रंग येतो. चिकनची चव मस्त उतरते.

अगदी आवडत असेल तर वाढताना क्रिम.

कोळंबीची खिचडी

साहित्य

पाव किलो कोळंबी

लसूण 7-8 पाकळ्या

मिरची एक

एक कांदा

ओलं खोबरं नारळाची अर्धी वाटी

हळद, तिखट, मीठ

तांदुळ दोन वाट्या

कोथिंबीर

कृती

तांदुळ धुवून निथळत ठेवावेत.

कोळंबी निवडून पोटातला काळा धागा काढून स्वच्छ धुवावी. निथळून त्यावर हळद तिखट मीठ टाकून नीट मिक्स करावी.

ओलं खोबरं, लसूण, मिरची बारीक वाटून घ्यावी.

कांदा बारीक चिरून घ्यावा

एकीकडे आधणाचं पाणी बारिक गॅसवर ठेवावं. दुसरीकडे जाड बुडाच्या पातेल्यात तेल टाकून त्यात कांदा टाकून गुलाबीसर परतावा. मग त्यात कोळंबी टाकून ती ही परतावी. आता तांदूळ टाकावेत तेही परतावेत. त्यावर वाटणं टाकून आधणाचं पाणी टाकावं, मीठ टाकावं. आणि छान उकळी आली की गॅस बारीक करून झाकण घालून खिचडी शिजू द्यावी. वाढताना वरून ओलं खोबरं, कोथिंबीर आणि लिंबू. सोबत पोह्याचा पापड तळुन वा साधा.

सोजी

 साहित्य

तांदुळ एक वाटी

बटाटा मध्यम एक सालं काढून मध्यम (साधारण 2इंचाचे)  तुकडे

कांदा मध्यम एक, बटाट्या सारखेच तुकडे

शेंगदाणे मूठभर

लवंग ४-५, दालचिनी एक तुकडा

हिंग, तिखट, हळद, मीठ चवी प्रमाणे

तेल 2 चमचे,  आवडत असेल तर तूप वापरलं तरी चालेल.

पाणी तीन वाट्या आधण, लागले तर अजून अर्धा वाटी.

कृती

तांदूळ धुवून निथळवत ठेवावेत. बटाट्याचे तुकडे धुवून निथळवत ठेवावेत.

पसरट, जाड बुडाच्या पातेल्यात किंवा कुकरमधे तेल/ तुप टाकावे. त्यात हिंग टाकून लगेच लवंगा, दालचिनी टाकून कांदा टाकावा. जरा परतून त्यावर बटाटे, दाणे टाकावे. आता हळद, तिखट टाकून परतावे. आता तांदूळ टाकावेत तेही परतावेत. मग आधणाचं पाणी टाकून मीठ टाकावे. सगळे खळखळ उकळले की गॅस बारीक करून झाकण लावून खिचडी मऊ शिजू द्यावी. कुकर असेल तर तीन शिट्या करून दोन मिनिटं बारीक गॅस वर ठेवावा. ही खिचडी मऊसर असते.

तयार खिचडी वर तूप, सोबत पापड. आवडत असेल तर ताकाला वरून तूप जिऱ्याची फोडणी देऊन चमचाभर साखर, मीठ, कोथिंबीर घालून तेही सोबत द्यावे. 

सीकेपी पद्धतीचे कोंबडीवडे पीठ

 

साहित्य( कंसात प्रमाण)

तांदुळ (6), उडिद डाळ(2), धणे(1), चणा डाळ(0.5), जिरे(0.25), मिरे(0.10)

तांदूळ धुवून सुकवून घेणे.

नंतर सगळं सुटं सुटं मंद गॅसवर गुलाबी भाजून घेणे.

आणि मग दळणे.

मटण, चिकन, मसूर आमटी वगैरे सोबत खायचे असतील तर,  मीठ, हळद, पाणी घालून थालिपीठा इतकं घट्ट भिजवून झाकून ठेवणे. दहा मिनिटांनी पाण्याचा हात लावून पुरीसारखे थापून तळणे. टम्म फुगतात.

नुसते खायचे असतील तर जास्तीचे तिखट, कोथिंबीर घालायचे. अन थापताना मेदुवड्या सारखे मधे भोक पाडून मग तळायचे. हेही रिंगसारखे फुगतात.

रसलिंबू - लिंबाचे तिखट गोड लोणचे

 साहित्य 

लिंबू सहा

एक वाटी साखर

मीठ चमचाभर

तिखट 3 चमचे

हळद अर्धा चमचा

तेल 3 चमचे

हिंग

कृती

लिंबं स्वच्छ धुवून 10 मिनिटं पाण्यात ठेवावीत. मग पाच लिंबं प्रत्येकी 8 भागात चिरून, बिया सगळ्या नीट काढून टाकाव्यात. एका लिंबाचा रस काढून वेगळा ठेवावा.

आता लिंबाचे तुकडे ग्राईंडरमधे घालून बारीक वाटावे. सालीसकट.

मोठ्या भांड्यात तेल घेऊन त्यात हिंग टाकावा. हिंग फसफसला की त्यावर लिंबाचे वाटण टाकावे. हळद, तिखट, मीठ, साखर सगळे घालून मोठ्या गॅसवर परतत रहावे. साखर विरघळून थोडी आटत आली की लिंबाचा रस घालून हलवून मंद गॅसवर शिजू द्यावे. लक्ष ठेवून मधून मधून परतत रहावे. मिश्रणाचा रंग जरा डार्क होऊ लागला की गॅस बंद करावा पण अधून मधून हलवावे.

पूर्ण गार झाले की बरणीत भरावे. साधारण एका दिवसातच लोणचे मुरु लागले, लगेच वापरायला हरकत नाही. 4-5 दिवसात सालीचा कडवटपणा पूर्ण जातो. या प्रमाणात साधारण दोन वाट्या रसलिंबू होते. 

सीकेपी आंबटवरणं

तूरडाळ1 वाटी मूगडाळ 1 मुठ. धुवून, पाणी घालून, हळद, हिंग आणि थेंबभर तेल टाकून कुकरमधे छान शिजवून घ्यायची. मग ती रवीने मोडून पाणी टाकून जरा सैल करायची. हे सगळ्यांना सेम.

1. तेलाची फोडणी करून त्यात मोहरी, ती तडतडली की मेथ्या हिंग कढिपत्ता. त्यावर बारीक चिरलेला कांदा. तो ट्रान्सपरन्ट झाला की त्यावर शिजवलेली डाळ टाकायची. वर तिखट, मीठ, चिंचेचा कोळ, गुळ,  कोथिंबीर टाकून पाच मिनिटं उकळवाचं.

2. पातेल्यात डाळ उकळवत ठेवायची त्यात तिखट, चिंचेचा कोळ, कोथिंबीर टाकायची. दुसरीकडे कढल्यात तेल. त्यात मोहरी अन ठेचलेला लसूण टाकायचा. मोहरी तडतडली की हिंग टाकून लगेच फोडणी उकळत्या आंबटवरणात टाकायची. वरून झाकण ठेवायचं. पाच मिनिटं तशीच उकळवायचे. 

3. पातेल्यात डाळ उकळवत ठेवायची. त्यात आमसुलं, कोथिंबीर टाकायची. दुसरीकडे तेलात मोहरी, बडिशेप चिमुटभर, लसूण ते तडतडलं की हिरवी मिरची, कढिपत्ता अन सगळं लगेच आंबटवरणात. झाकण. पाच मि उकळवणे.

4. तेलात मोहरी, हिंग, कढिपत्ता.  त्यावर बारीक चिरलेला कांदा परतणे. वर बारीक चिरलेला टॉमेटो परतणे. तेल सुटू लागलं की त्यावर डाळ, तिखट, मीठ. ओलं खोबरं, लसूण बारीक वाटून ते आंबटवरणात घालणे.  वरून कोथिंबीर

5. डाळ शिजवतानाच त्यात बारीक चिरलेला कांदा, टॉमेटो आणि हिरवी मिरची टाकायची.

सगळं,घोटून पाणी घालून उकळवत ठेवायचं. कढल्यात तेल, त्यात मोहरी, मेथ्या, हिंग, कढिपत्ता याची फोडणी करून ती आंबटवरणावर. झाकण. पाच मि उकळणे.

तळटिप- सीकेपी तिखटामधे धणे, बडिशेप इनबिल्ट असते. जर सेम स्वाद हवा असेल तर याच्या पावडरी चिमुटभर टाकत चला.

झटपट अंडा बिर्याणी

 साहित्य:

तांदुळ शक्यतो बासमती १ वाटी

अंडी २

बटाटे २

कांदे २

टॉमेटो १

आलंलसूणपेस्ट १ चमचा

तिखट १ चमचा

हळद अर्धा चमचा

गरम मसाला पूड १ चमचा

४मिरे, दालचिनीचे २ तुकडे, तमालपत्र १

४ काजू, ४ बेदाणे

पुदिना, कोथिंबीर एक मुठ

दही २ चमचे

पाव कप दूध

तेल

तूप १ चमचा

मीठ

कृती 

कुकरमधे पाणी घालून गॅसवर ठेवा

तांदुळ धुवून घ्या

कुकरच्या मोठ्या भांड्यात तांदुळ दोन वाट्या पाणी, एक चमचा तुप, अर्धा चमचा गरम मसाला आणि तांदळापुरतं मीठ घाला

दुसऱ्या भांड्यात अंडी आणि बटाटे ठेवा

दोन्ही भांडी कुकरमधे ठेवून कुकर बंद करून २ शिट्या करून ५ मिनिटं बारीक गॅसवर ठेवा। अन नंतर बंद करा

कुकर होई पर्यंत मोठ्या पॅनमधे तेल जरा जास्ती घ्या। दिड कांदा उभा चिरून तो तेलात परता। लाल होई पर्यंत परतायचा। दुसरीकडे उरलेला अर्धा कांदा बारीक चिरा। टॉमेटो बारीक चिरा।  काजु उभ्यात २-२ तुकडे करा। बेदाणेही उभ्यात दोन भाग करा।

एव्हाना कुकर झाला असेल गॅस बंद करा

कांदा लाल होईस्तोवर परता

गॅस बंद करून आता कांदा निथळून बाहेर काढा। तेल तसेच राहू देत

कुकर गार झाला असेल तर अंडी बटाटे काढून गार पाण्यात घाला

भाताचे भांडे काढून भात काट्याने मोकळा करा

अंडी बटाटे सोलून काट्याने जरा टोचे मारा

कांदा परतलेल्या  पॅन खालचा गॅस चालू करा। अंडी बटाटे त्यात टाका। वरून थोडे थोडे मीठ हळद तिखट टाका आणि पटपट परतून घ्या अन बाहेर काढा।

आता बारीक चिरलेला कांदा त्याच तेलात परता।  आलं लसूण पेस्ट परता। काजू, बेदाणे, मिरे, दालचिनी, तमालपत्र घाला। आता टॉमेटो टाकून परता मग गॅस बारीक करून झाकण ठेवा।

अंडी अन बटाटे अर्धे कापा।

झाकण काढून टॉमेटो शिजे पर्यंत परता। आता गॅस बंद करून मीठ हळद तिखट गरम मसाला घाला जरा परता। आता दही जरा घोटून यात घाला थोडे परता।  दिड वाट्या पाणी यात घाला। गॅस सुरु करा, बारीकच ठेवा।  कापलेले बटाटे अन अंडी नीट रचा। आता यावर निम्मी कोथिंबीर पुदिना टाका।वरून लाल परतलेला कांदा घाला। आता भात पसरा वरून उरलेली कोथिंबीर पुदिना टाका। सगळे हाताने जरा खाली दाबून बसवा।

ज्या भांड्यात परतलेली अंडी बटाटे काढून ठेवले  त्यात पावकप दुध टाका। छान निपटून घ्या। दुधाचा रंग छान केशरी होईल। हे दुध भातावर गोलाकार टाका।

आता झाकण ठेऊन मंद गॅसवर किमान १५ मिनिटं राहु देत। नंतर गॅस बंद करा।

५ मिनिटांनी वाढून घ्या, झटपट अंडा बिर्याणी!

 

साबुदाणा खिचडी (नेनेकाकु अन अवल मिश्रित😝)

कपभर साबुदाणा आधी नीट धुवा।

पांढरं पाणी गेलं की बाऊलमधे साबुदाणा भिजून वर अर्धपेर पाणी येईल असं भिजवा। रात्रभर। 

सकाळी ताटात पसरून ४ चमचे दुध वरून टाका।

एक मोठा बटाटा सोलून चौकोनी तुकडे करून चिरायचे। मिरच्या ३-५मोठे तुकडे

दाणे मुठभर मंद गॅसवर भाजून सोलून दाण्याचे कुट करणे

हे झाल्यावर कुकरमधे पाणी घालून स्टँड ठेवून त्यावर कुकरच्या मोठ्या भांड्यात भिजवलेला सादा, त्यात चमचाभर तेल साखर मीठ(सादापुरतं) घालून मिक्स करू,  शिटी काढून झाकण लावून १० मि वाफवत ठेवावा

दुसरीकडे तुप/तेल पॅनमधे तापवून जिरे घालून त्यावर बटाट्याचे तुकडे टाकायचे।मोठ्या गॅसवर जरा परतून मग ग॓स बारीक करून झाकण ठेवायचं।

कुकरची १० मि झाली असतील मग गॅस बंद करून सादा काढून ताटात पसरायचा। जरा चिकट वाटेल घाबरू नका। जरा पसरून गार होऊ दे

एव्हाना बटाटा शिजत आला असेल। तो शिजलाय बघून त्याच्यापुरतं मीठ टाका। त्यावर सादा टाका परता। दाकु टाका ५ मि परता। मऊ मोकळी खिचडी तयार

कणकेचा गार्लिक नान

कणीक दुधात  सैलसर भिजवली. गोळा थोडा मोठा घेतला. नुसतं लाटलं वरून लसूण कोथिंबीर. पोळपाटावरच उलटवलं खालची बाजू वर आली, तिला पाणी लावलं. अन पाण्याची बाजू नॉनस्टिकवर टाकली. मंद गॅसवर होऊ दिली. खालून लालसर झाली तशी गॅस मोठा करून गॅसवर वरची बाजू शेकली, फुलकी सारखी. उलटं करून खालचीपण जरा काळी केली. भाकरी, फुलकी, चपातीचं कॉंबो

गोळवणी ( गोळ्याची आमटी)

साहित्य -
1 कांदा बारीक चिरुन
1 टॉमेटो बारीक चिरून ( टॉमेटो आवडत नसेल तर चमचाभर चिंचेचा घट्ट कोळ)
तिखट, मीठ, हळद, जिरेपूड, हिंग
गुळ अर्ध्या लिंबा एव्हढा
किसलेलं सुकं खोबरं मुठभर
लसूण 5-6 पाकळ्या
बेसन 5-6 चमचे
कोथिंबीर

कृती -
बारीक गॅसवर भांड्यात 2 चमचे तेलावर हिंग घालून कांदा परतत ठेवावा.
मिक्सीत किसलेलं सुकं खोबरं( न भाजता), लसूण, 1 च बेसन थोडं पाणी घालून बारीक करून घ्या.
कांदा गुलाबीसर झाला की टॉमेटो टाकून थोडं परता( टॉमेटो नको असेल तर पुढचं करा). आता त्यात हळद, तिखट, मीठ, गुळ, कोथिंबीर ( टॉ घातला नसेल तर आता चिंचेचा कोळ घाला) घाला. आता त्यावर वाटण घाला. थोडं परतून 2-3 पेले पाणी घालून बारीक गॅसवर उकळत ठेवा.
बाऊलमधे 5 चमचे बेसन घ्या. तेव्हढ्याला लागेल इतकं तिखट हळद मीठ घाला. दोन चमचे उकळत ठेवलेले सांभाळून घाला. एक चमचा तेल टाकून बेसन घट्ट गोळा एकत्र करा. लागलं तर 1-2 चमचे पाणी घाला. पुऱ्यांना असते तेव्हढं घट्ट भिजवा. आता त्याचे 4 भाग करून एकेकाची त्याची जाड शेवेसारखी गुंडाळी करा.  आणि उकलत असलेल्या आमटीत मण्या एव्हढे तुकडे करत टाकत रहा. कंटाळा येई पर्यंत किंवा गोळा संपे पर्यंत टाकत रहा.
आता झाकण ठेऊन पाच मिनिटं शिजू दे. झाकणावर पाणी ठेवा. म्हणजे आमटी उतू जाणार नाही. पाच मिनिटांनी चपाती/ भाताबरोबर ओरपा. सोबत भाजलेला पापड असेल तर बहारच.

वालाची खिचडी

साहित्य:

भिजवून मोड आलेले सोललेले वाल एक वाटी

तांदुळ एक वाटी

ओलं खोबरं पाव वाटी

लसूण 7-8 पाकळ्या

हिरवी मिरची एक

कांदे दोन

हिंग, हळद, तिखट, मीठ

कोथिंबीर, लिंबु/दही

कृती

कांदे बारीक चिरून घ्यावे.

निम्मा कांदा, खोबरं, लसूण, मिरची सगळं बारीक वाटावं थोडं पाणी घालून.

पातेल्यात 3-4 चमचे तेल घालून ते चांगलं गरम झालं की गॅस बारीक करून त्यात हिंग, हळद घालून वर वाल परतावेत दोन मिनिटं, मग त्यावर कांदा घालून तोही परतावा दोन मिनिटं. आता धुतलेले तांदूळ परतावेत दोन मिनिटं. मग वाटण घालून दोन मिनिटं परतावं.

आता आधणाचं पाणी घाला. तिखट, मीठ घाला. गॅस मोठा करून छान उकळू द्या. पाणी थोडं आळलं की कोथिंबीर टाकून गॅस बारीक करून झाकण ठेऊन खिचडी शिजू द्या. साधारण 7-8 मिनिटं.

वाढताना सोबत ओलंखोबरं, कोथिंबीर, लिंबू वाढा. पोह्याचा पापड सोबत असेल तर लिंबा एेवजी दही  :)

अप्पे

मूग, हरबरा, उडिद, तूर, मसूर सगळ्या डाळी 5-5 चमचे रात्री बिझत घालणे.
एक वाटी इडली रवा रात्री भिजत घालणे.
सकाळी सगळं भरडसर वाटून घेणे.
मका, मटार 5-5 चमचे घेऊन ते पाण्यात उकळत ठेवणे.
एका बाऊलमधे भरड वाटलेल्या डाळी, भिजवलेला इडली रवा एकत्र करावे.
कांदा, कांदापात, सिमला मिरची सगळे बारीक चौकोनी चिरून घ्यावे. गाजर किसून घ्यावे. हे सगळे 5-5 चमचे पिठात घालावे. आता उकडलेले मटार, मका दाणे पाण्यातून काढून तेही पिठात टाका.
7-8 मिरे खरडून घ्या. ते पिठात टाका.
हिरव्या मिरच्या 2-4 बारीक चिरून पिठात टाका.
आता पिठात मीठ घालून, हवे तसे पाणी घालून सरसरीत भिजवा. फार पांतळ नको.
अर्धातास झाकून ठेवा.

नंतर अप्पे पात्रात थोडे तेल टाकून 1-1 चमचा मिश्रण टाकून झाकण ठेऊन 3-4 मिनिटं बारीक गॅसवर शिजू द्या . झाकण काढून पलटवा,  गॅस मोठा करून 2 मिनिट ठेवा. मग काढून सॉर, चटणी या सोबत सर्व्ह करा.

साबुदाणा खिचडी

एक कप साबुदाणा घेऊन तो पाण्यात 2-3 दा धुवून घ्यावा. सगळा स्टार्च निघू  पाणी स्वच्छ व्हायला हवं. मग बाऊलमधे साबुदाणा आणि अर्धा कप दूध भिजत ठेवावं रात्रभर.

सकाळी उठल्यावर आधी साबुदाणा हाताने मोकळा करून घ्यावा.

एक उकडलेला बटाटा मध्यम फोडी करून घ्या. दोन मिरच्या बारीक चिरा. पाव कप भाजलेल्या दाण्याचे कुट करून घ्या.

आता साबुदाण्यात कुट, मिरची, चवी पुरते मीठ, पाव चमचा साखर घालून सगलं मिक्स करा.

मोठी कढई तापत ठेवा. दोन चमचे तेल/ तूप  टाका. अर्धा चमचा जिरे टाकून ते तडतडले की बटाटे टाका. मोठ्या गॅसवर ते परता. परतत असताना कढईत सगळीकडे तेल/ तूप लागेल असे पहा. दोन मिनिटांनी साबुदाणा मिक्स घाला. गॅस मोठाच ठेऊन भरभर परता. ही स्टेप महत्वाची. सगळी खिचडी नीट परतली गेली की गॅस बारीक करून झाकण ठेवा. एक छान वाफ येऊ द्यात. मग झाकण काढून पुन्हा एकदा परतून गॅस बंद करा.

वाढताना वरून ओलं खोबरं टाका

थंडी स्पेशल उंधियु

थंडीत वेगवेगळ्या भाज्या बाजारात येतात, त्यात सुरती पापडी नावाची शेंगाभाजी येते. फिकट पोपटी रंगाची, कोवळी पापडी असते ही. ती या उंधियुची मेन तारका. पण तरीही ही मल्टिस्टार रेसिपी. खरं तर वन डिश मिल सारखी नुसतीच खायची. अगदीच वाटलं तर सोबत पुरी, जिलेबी. किंवा मग नुसतच उंधियु आणिि नंतर दही भात. चला तर पदर, ओढणी, कंबर बांधून कामाला लागा. अतिशय पेशन्स वाली रेसिपी आहे हं ही.

साहित्य
पाव किलो सुरती पापडी
100 ग्रॅम प्रत्येकी : मटार, तूर दाणे, लिलवे(ओल्या वालाच्या शेंगांमधले वाल), ओला हरभरा, ओले वा भिजवलेले शेंगदाणे, सुरण, रताळे, बटाटे, गराडू ( आतून किरमिजी रंग असलेला एक कंद)
लांब वांगी दोन, छोटी गोल वांगी 4-6
मेथीची पाने दोन वाट्या
कोथिंबीर एक वाटी
मिरच्या 7-8
लसूण पाकळ्या 7-8
किसलेलं सुकं खोबरं चार चमचे
दाण्याचे कुट दोन चमचे
बेसन पाव वाटी + थोडे
कणीक 4 चमचे
ओवा दोन चमचे
तिखट, हळद, हिंग, मीठ चवीनुसार
तेल भरपूर  ही भाजी वाफेवरच करायची असल्याने तेल अंमळ जास्ती लागते. शिवाय सुरण, गराडू वगैरे कंद असल्याने तेल आवश्यक असतं. तरीही आपापल्या आवडीनुसार कमी करू शकता.

पूर्वतयारी:
सुरती पापडी निवडून घ्यावी.
बाकी सर्व दाणे शेंगांमधून सुटे करून धुवून घ्यावेत.
सर्व कंद स्वच्छ धुवून, सालं काढून एक इंच चौरस चिरून पाण्यात ठेवावेत.
लांब वांगी दोन भाग करून जाडसर चिरून पाण्यात ठेवावी. गोल वांगी देठं काढून मधे भरल्या वांग्यासाठी काप देतो तशी चिरून पाण्यात ठेवावी.
मेथीची पाने, चिरून धुवून निथळत ठेवावी.

कृती :
कढईत वाटी, दिड वाटी तेल तापत ठेवावं. चिरलेल्या मेथीमधे 4-5 लसूण चिरून घालावेत, तिखट, हळद, हिंग, मीठ टाकावे, कणीक घालावी, पाव वाटी बेसन घालावे. सगळे मिक्स करावे, लागले तर थोडे पाणी घालून घट्ट भिजवा. आता हाताला तेल लावून त्याची मुठियं (मुठीमधे मिश्रण घेऊन दाबावं, मुठी सारखे तयार होते ते मुठिय) करून घ्यावीत.
तेल तापलं की त्यात ही मुठियं छान खरपूस तळून बाजुला ठेवावी.
आता मोठं, जाड बुडाचं भांड गॅसवर चढवा. तळणाचं तेल 4 डाव कढईतून पातेल्यात घ्या. त्यात ओवा टाका. ओवा तडतडला की त्यात सुरती पापडी टाका, सगळे दाणे घाला आणि मंद गॅसवर सगळं परता. आता त्यावर परात ठेवा अन परातीमधे पेलाभर पाणी घाला.
आता गोल वांगी भरण्यासाठी सारण तयार करा. सुकं खोबरं, 3-4 लसूण, एक हिरवी मिरची मिक्सरला फिरवून घ्या. त्यात चमचाभर बेसन, दाण्याचे कुट, तिखट, हळद, मीठ , एक चमचा तेल घालून सगळं एकत्र करा. ते वांग्यांमधे भरा.
आता परात बाजुला करून(पाणी आत पडणार नाही याची काळजी घेत) सगळं हलवा. त्यात भरलेली वांगी, कंद प्रकारातले सगळे तुकडे घाला. वांग्याचे सारण उरलं असेल तर तेही घाला. पुन्हा सगलं नीट हलवा. अन परात ठेवा. परातीत पाणी आहे ना चेक करा.
आता कोथिंबीर, 3-4 लसूण, 3-4 मिरच्या मिक्सरमधून फिरवून घ्या. थोडं पाणी टाकून छान पेस्ट करा. कढईतलं तेल बाजुला करा, 3-4 चमचे तेल कढईत ठेवा. कढई पुन्हा तापत ठेवा. त्यात लगेचच कोथिंबीरीचे वाटण परता. तेल सुटू लागलं की गॅस बंद करा.
पातेल्यातल्या सगळ्या भाज्या पुन्हा एकदा परता.
यातला बटाटा, सुरण शिजत आला की त्यात कोथिंबीरीची ग्रेव्ही टाका. परता. मुठियांमधले 3-4 मुठियं जरा चुरून भाज्यांवर पसरा. अंदाजाने मीठ घाला, उरलेली मुठियंही घाला. सगळे पुन्हा एकदा नीट हलवा. वर परात ठेवा. आता त्यावर पाणी नको.
दर पाच मिनिटांनी सगळे नीट हलवा.चव चाखून बघा, तिखट, मीठ अॅडजेस्ट करा.
दहा मिनिटांनी हलवून परात झाकून ठेवा अन दोन मिनिटांनी गॅस बंद करा.
दहा मिनिटांनी झाकण काढा अन बाऊल मधे घेऊन स्वाद घ्या.

व्हेज मटण बिर्याणी

साहित्य :

दोन वाट्या भाजणी, तीन वाट्या दिल्ली राईस, तमालपत्र 2-3, मसाला वेलची एक, साधी वेलची3-4, मिरे 8-10, काजु 10-12( पाकळ्या सुट्या करून घ्या), उभे चिरलेले मोठे4-5 कांदे, पुदिना किमान चार मुठी, दही 3 मोठे चमचे, हळद, तिखट एक चमचा, कांदालसूण मसाला एक चमचा, मीठ, तेल तळणासाठी, साजुक तूप 6 चमचे, एक टॉमेटो , कप भर दूध, 8-10 केशराच्या काड्या, 2 बटाटे

कृती:

दिल्ली राईस तांदूळ  भिजवून निथळत ठेवा.

कांदे उभे चिरून रुमालावर पसरून ठेवा

पुदिना धुवून बारीक चिरून ठेवा

भाजणीमधे तिखट, मीठ, हळद, बारीक चिरलेला कांदा आणि कोथिंबीर घालून दोन चमचे दही घालून थोडे पाणी घालून भज्यासाठी लागते तसे पीठ भिजवून घ्या.

आता तेलामधे या पिठाची मध्यम आकाराची भजी तळून घ्या. ती बाजूला ठेवा.¹

आता त्याच कांदा तेलात तळायला घ्या

दुसरीकडे पसरट भांड्यात, 3 चमचे साजुक तुपात तमालपत्र, मिरे, मसाला वेलची, साधी वेलची, काजू परतून घ्या

त्यावर निथळत ठेवलेले तांदूळ परता. एक चमचा दही, आधण आणि मीठ टाकून भात मोकळा शिजवून घ्या²

शिजलेला भात परातीत निवत ठेवा. याच वेळेस तमालपत्र, मिरे , मसाला वेलची, साधी वेलची वाटलं तर काढून टाका.

सगळा कांदा तळून झाला की त्यावर कांद्यावर एक चमचा तिखट, एक चमचा कांदालसूण मसाला घालून मिक्स करून घ्या.³

टॉमेटो दोन भाग करून उभे चिरुन घ्या⁴

दोन बटाटे सालं काढून त्याच्या पांतळसर गोल चकत्या कापून त्यालाा थोडं मीठ लावून ठेवा.

थर लावणे :

परसट जाड बुडाच्या पातेल्यात दोन चमचे तूप टाकून त्यावर  बटाट्याच्या काचऱ्या पसरा. त्यावर 1/3 भात घालून तो पसरून घ्या. त्यावर 1/3 कांदा घाला. भज्यांपैकी 1/2 भजी पसरा. चिरलेला सगळा टॉमेटो पसरा. 1/2 पुदिना पसरा.

आता दुसरा थर. पुन्हा 1/3 भात, 1/3 कांदा, 1/2 भजी, 1/2 पुदिना, तळलेले 1/2 काजु

आता तिसरा थर. उरलेला 1/3 कांदा, उरलेला 1/3 भात, उरलेले 1/3 काजु.

आता अर्धाकप दूधात केशर टाका. हे दूध बिर्याणीवरती पसरा

बिर्याणीवरती घट्ट झाकण लावा.

खाली जाड तवा ठेऊन बारीक आचेवर किमान अर्धा तास ठेवा. नंतर गॅस बंद करून 15 मिनिटांनी बिर्याणी ताटात वाढून घ्या

6-8 जणांसाठी भरपूर होईल

डाळढोकळी

साहित्य:
एक वाटी तूरडाळ, अर्धी मूठ मूगडाळ
कणीक एक वाटी
तिखट, हळद, मीठ, हिंग, तेल
गूळ लिंबा एव्हढा
चिंच अर्ध्या लिंबा एव्हढी तिचा कोळ
ओवा छोटा चमचा
दोन लवंगा

कृती:
दोन्ही डाळी एकत्र करून धुवून थोडं जास्त पाणी आणि थोडी हळद, हिंग आणि चमचाभर तेल टाकून कुकरमधे नीट शिजवून घ्यावी. कुकर गार झाला की लगेच रवीने एकजीव करून घ्यावी. मोठ्या पातेल्यात ही डाळ आणि त्यात दोन पेले पाणी घालून उकळवत ठेवा.
आता कणिक, हळद, तिखट, मीठ, तेलमिक्स करून पाणी घालून पोळ्यांसारखी कणीक भिजवावी.
डाळीमधे गूळ, चिंचेचा कोळ, मीठ, तिखट घालून उकळवत ठेवा. उकळी आली की गॅस बारीक करा. हे सगळे सरसरीतच असू दे.
आता कणकेचे गोळे फुलक्यांसारखे पांतळ लाटा. पोळीला वरून, खालून तेलाचा हात फिरवा. मग कातणीने शंकरपाळ्यासारखे काप करा आणि ते उकळत्या डाळीच्या पाण्यात सोडा( हे म्हणजे ढोकळी) अशा किमान 6-8 पोळ्यांचे काप डाळीत घाला. एक लक्षात ठेवा, काप घालत असताना डाळ चांगली उकळती असायला हवी. आवश्यक तेव्हा गॅस मोठा, लहान करा. सगळे काप घातले की हवे असेल तर पाणी अजून वाढवा.
आता गॅस बारीक करून घट्ट झाकण लावा. 5 मिनिटं डाळढोकळीला दमदमीत वाफ येऊ द्या.
आता छोट्या लोखंडी कढईत 4 चमचे तेल गरम करत ठेवा. त्यात चमचाभर ओवा घाला, तो तडतडला की त्यात दोन लवंगा आणि चिमुटभर हिंग टाका, गॅस बंद करा अन ही फोडणी लगेच डाळढोकळीच्या भांड्यात ओता. शक्यतो कढईही बुडवा. आता डाळढोकळी नीट खालून हलवा. आणि पुन्हा एक वाफ येऊ द्या. तयार आहे गरमागरम डाळढोकळी!
स्त्रोत: नवसारीचे आजोळ